OAV biz haqimizda

Farzandlarimizga kitob sovg‘a qilaylik!

“O‘ztransgaz” aksiyadorlik jamiyati tomonidan tashkil etilgan kitob yarmarkasi shunday nomlandi.

1 iyun – Xalqaro bolalarni himoya qilish kuni munosabati bilan o‘tkazilgan ushbu yarmarka tashkilotning o‘ziga xos ma’naviy tashabbusi bo‘ldi. 

Unda bolalar uchun turli badiiy adabiyotlar, ertak, ta’limiy va rivojlantiruvchi kitoblar namoyish qilindi. Tadbirning asosiy maqsadi  yosh avlodning kitobga bo‘lgan qiziqishini oshirish, ularni bilimli, ma’rifatli va ma’naviyatli qilib tarbiyalashdan iborat.

Yarmarkada bolalar va ota-onalar birgalikda ishtirok etdi va har bir oila farzandi uchun eng yaxshi kitobni tanlab olish imkoniga ega bo‘ldi. 

“O‘ztransgaz” AJ axborot xizmati rahbari Shahnoza Ravshanovaning ma’lum qilishicha, tashkilot rahbariyati kelgusida ham yoshlar ma’naviyatini yuksaltirishga qaratilgan bunday tashabbuslarni doimiy ravishda o‘tkazib boradi.

–Tashkil etilgan yarmarkani “Farzandlarimizga kitob sovg‘a qilaylik!” deb nomladik. Biz farzandlarimizning ma’naviy rivojlanishi, ularning bilimga chanqoqligi va mustaqil o‘qishga bo‘lgan qiziqishi uchun turli loyihalarni amalga oshirishga harakat qilamiz. Bu kitob yarmarkasi ham aynan shu maqsadda tashkil qilindi. Kitob eng yaxshi do‘st va eng yaxshi sovg‘a ekanini farzandlarimizga his ettirishni istaymiz. Muhimi, kitob yarmarkasida qatnashgan bolalar va ularning ota-onalari tadbirdan mamnun bo‘lib, bunday tashabbuslar farzandlar tarbiyasida muhim o‘rin tutishini e’tirof etdilar. Albatta, bu biz uchun quvonarlidir, –dedi Sh.Ravshanova.

Aytish joizki, “O‘ztransgaz” AJ uchun bu loyiha nafaqat ma’naviy ahamiyatga ega, balki korporativ ijtimoiy mas’uliyatni oshirishning ham yorqin namunasidir.

N.Ziyodullayeva, O‘zA